Les saman við barninum

Lesing er bæði at kenna orðini og skilja innihaldið. Ein løta við felags lestri og samrøðu um tekstin stuðlar báðum pørtum.

Áðrenn tit lesa

• Hyggið at permuni, heitinum og myndunum. Hvat heldur barnið, at bókin er um?
• Tosið um tað, sum barnið longu veit um evnið.

Meðan tit lesa

• Tosið um nýggj orð og knýtið tey at upplivingum hjá barninum.
• Set opnar spurningar: Hví heldur tú, at persónurin ger soleiðis? Hvat man henda næst?
• Lesið ein setning umaftur, um hann er torførur at skilja.

Tá tit eru liðug

• Lat barnið fortelja, hvat teksturin var um.
• Tosið um tað, sum var stuttligt, spennandi ella undrunarvert.

Um lesingin er torfør

Tosa við flokslæraran um, hvat er trupult, og hvussu tit kunnu stuðla lesingini heima.

Les skjótari – lesivegleiðing (PDF)

Mannagongdir í Sorgarbólkinum

Fyrsta fráboðan

Heitt verður í faldara skúlans á foreldur og avvarðandi beinanvegin at boða skúlanum frá, um næmingur doyr ella missir ein av sínum næstu.

Heitt verður á avvarðandi hjá starvsfólki skúlans beinanvegin at boða skúlanum frá, um starvsfelagi doyr ella missir ein av sínum næstu.Tann, sum fyrst frættir um andlát, sum rámar næming ella starvsfólk skúlans, boðar skúlanum/leiðsluni frá.

Andlát í vikuskifti/feriu

Doyr næmingur ella starvsfólk í vikuskifti/feriu boða tey avvarðandi antin leiðsluni, flokslæraranum ella onkrum í toyminum frá, og leiðslan setir tilbúgvingarætlanina í verk fyrsta dagin eftir feriuna.

Andlát uttan fyri skúlatíð

Doyr næmingur uttan fyri skúlatíð boðar leiðslan beinanvegin flokslæraranum og lærarunum í toyminum frá andlátinum.
Leiðslan boðar hinum starvsfólkum skúlans frá, áðrenn skúladagurin byrjar.

Húsavørðurin vindur flaggið í hálva stong.

Flokkurin, sum hevur mist

Flokslærarin, ella annar lærari, sum kennir flokkin væl og møguliga skúlastjórin/prestur/sálarfrøðingur fara inn við flokkinum.

• Næmingarnir fáa at vita, hvat er hent.
• Tosað verður gjølla um tað, sum er hent.
• Borðið hjá tí farna kann vera prýtt við blómum, ljósi og mynd.
• Næmingarnir fáa høvi at gráta og práta, minnast og spyrja.
• Næmingarnir kunnu evna okkurt til, sum foreldrini, sum mist hava, kunnu fáa (t.d. brøv, tekningar, søgur, yrkingar).
• Næmingarnir sleppa at gera okkurt heilt annað henda dagin t.d. fara túr, spæla tónleik, fáa drekkamunn o.a.

Flokslærarin og/ella annar lærari, sum kennir flokkin væl, er saman við næmingunum allan skúladagin.

Hinir flokkar skúlans

Lærararnir, sum hava hinar flokkarnar, fara inn við sínum flokkum og greiða frá, hvat er hent.

Kunning til heimini

Heimini fáa skriv. Skúlin greiðir frá, hvat er hent, og nær minningarløta skúlans verður.

Týdningarmikið

Toymið/leiðslan syrgir fyri, at næmingarnir í flokkinum, sum hava mist, ikki koma heim í tóm hús.

Vitjan í heiminum

Flokslærarin/ annar lærari, sum hevur flokkin nógv, og skúlastjórin vitja heimið.

• Hava blómutyssi og heilsan frá skúlanum við.
• Greiða frá minningarløtuni. Kanna, um tey avvarðandi hava hug at luttaka ella vitja flokkin ein av fyrstu døgunum ella seinni.
• Kanna, um tey avvarðandi hava serlig ynski ella brúk fyri hjálp.
• Fáa at vita, nær jarðarferðin verður, og hvussu hon fer fram.
• Handa møguligar heilsanir frá flokkinum.

Minningarløtan

Minningarløta verður í høllini kl. 9.30 annan skúladagin eftir hendingina.

• Flaggið verður vundið í hálva stong.
• Í høllini verður borð sett upp við ljósi og blómutyssi.
• Sálmur verður sungin.
• Prestur hevur bønarhald.
• Tøgn.
• Sálmur.

Flokslærararnir ella annar lærari, sum kennir flokkin væl, eru saman við sínum flokkum tíman aftan á minningarløtuna.

Jarðarferðin

• Flaggið verður vundið í hálva stong.
• Eingin skúlagongd er undir jarðarferðini.
• Næmingar kunnu fylgja saman við foreldrunum.
• Skúlin sendir krans.

Møguleikar

• Minningarorð í bløðini frá skúlanum/lærarum/flokkinum.
• Foreldrafundur um tað at missa.
• Møguleiki fyri serkønari hjálp t.d. ( heilsusystir, prestur, sálarfrøðingur).
• Minnast fyrsta føðingardagin hjá tí deyða.

Um næmingur missir

• Leiðslan syrgir fyri neyðuga sambandinum við hini starvsfólkini.
• Flokslærarin fer inn í avvarðandi flokk og greiðir frá, hvat er hent og er saman við teimum eftir tørvi.
• Næmingarnir kunnu evna okkurt til skúlafelagan (søgur, myndir, yrkingar, brøv).
• Heimini fáa skriv.

Samkensluheilsan

Skúlin sendir heiminum eina blómuheilsan og møguligar heilsanir frá skúlafelagunum.

Flokslærarin saman við øðrum lærara floksins vitjar heimið.

Jarðarferðin

• Flaggið verður vundið í hálva stong.
• Umboð fyri skúlan fylgja.
• Floksfelagarnir kunnu fylgja í samráð við/ella saman við foreldrunum.

Hvat hendir síðani

Flokslærarin ella annar lærari, sum kennir flokkin væl, fyrireikar hinar næmingarnar, at floksfelagin kemur aftur.
Tá ið næmingurin kemur aftur í skúla, fylgja lærarar floksins næminginum.

Møguleiki fyri serkønari hjálp - heilsusystir/prestur/samkomuleiðari/sálarfrøðingur.

Týdningarmikið

• At tosa um missin/sorgina í flokkinum.
• Flokslærarin/annar lærari tosar við næmingin um sorgina av og á.
• Lærararnir fylgja við, hvussu næmingurin/floksfelagarnir hava tað.

Hinir flokkarnir

Flokslærarin greiðir næmingunum frá, at ein av næmingum skúlans hevur mist ein av sínum næstu.

• Tá ið starvsfelagi doyr
• Leiðslan boðar starvsfólki skúlans frá.
• Flaggið verður vundið í hálva stong.
• Flokkarnir fáa boðini.
• Um flokslærarin doyr, tekur tann, sum hevur flokkin næst eftir flokslæraran, sær av flokkinum.
• Umboð fyri skúlan vitja heimið. Hava blómutyssi og heilsan við.
• Minningarløta.
• Eingin skúlagongd er undir jarðarferðini.
• Næmingar kunnu fylgja í samráð við/ella saman við foreldrunum.
• Skúlin sendir krans - Minningarorð til Skúlablaðið.

Tá ið starvsfelagi missir hjúnafelaga ella barn

• Leiðslan boðar starvsfólki skúlans frá.
• Flaggið verður vundið í hálva stong.
• Flokkarnir fáa boðini.
• Um flokslærari hevur mist, tekur tann, sum hevur flokkin næst eftir flokslæraran, sær av flokkinum.
• Umboð fyri leiðslu og skúla vitja heimið. Hava blómutyssi og heilsan við.
• Skúlin sendir krans.

Tá ið fyrrverandi starvsfelagi doyr ella missir hjúnafelaga/barn

• Leiðslan boðar starvsfólki skúlans frá.
• Flaggið verður vundið í hálva stong.
• Umboð fyri leiðslu og skúla vitja heimið. Hava blómutyssi og heilsan við.
• Skúlin sendir krans.

Neyðugt at hava við, tá ið vit fara túr við næmingunum

Fartelefon við telefonlista og tlf.nr. skúlans - Fyrstahjálpsskjáttu - Tvey vaksin.

Um flokkur er fyri óhappi

• Hendir eitt óhapp á túrinum, verður boðað skúlanum frá.
• Næmingarnir mugu ikki fara einsamallir heim til tóm hús.
• Skúlin syrgir fyri neyðugari kunning til heimini.
• Møguleiki eigur at vera fyri hjálp og vegleiðing komandi dagarnar.

Skúlin má útvega sær

• Telefonlista (prestur, sálarfrøðingur, heilsusystir o.o.).
• Samkenslukort frá skúlanum.
• Faldara til starvsfólk skúlans um mannagongdina.
• Neyðuga kunning til heimini.