Fríggjadagin vitjaði landsstýrismaðurin í barna- og útbúgvingarmálum, Djóni Nolsøe Joensen, næmingaráðsskeiðið, sum Nám og Undirvísingarstýrið skipaðu fyri í Skúlanum á Argjahamri. Skeiðið var ætlað at geva næmingaráðunum betri førleikar og kunnleika til at virka í skúlasamfelagnum, so tey kunnu gera mun og vera ein sterk rødd fyri næmingarnar í teirra skúla. Djóni Nolsøe Joensen legði dent á, hvussu umráðandi tað er, at børn og ung fáa ávirkan á sítt skúlalív, og at tey verða tikin í álvara, tá ið avgerðir verða tiknar í skúlanum. Næmingaráðini eru ein týðandi partur av fólkaræðinum í skúlunum, og hetta skeiðið var eitt stig á leiðini at tryggja, at næmingarnir kenna sínar møguleikar og fáa førleikar at vera virknir luttakarar í skúlasamfelagnum.
Næmingaráðini spældu ein avgerandi leiklut á skeiðnum, har tey lærdu um, hvussu eitt næmingaráð kann arbeiða effektivt, og hvussu tey kunnu tryggja, at næmingar verða hoyrdir og hava ávirkan á teirra egnu skúlagongd. Hetta ger næmingaráðini til ein týðandi part av at menna trivnaðin og læringsumhvørvið í skúlanum, har tey virka sum bindilið millum næmingarnar og leiðsluna. Við hesum skeiðnum fáa næmingaráðini eisini betri amboð at bera fram sínar egnu meiningar og sjónarmið.
Hetta tiltakið vísir á, hvussu týdningarmikið tað er at útbúgva næmingaráðini, so tey kunnu taka lut í avgerðum, sum ávirka teirra skúlagongd og trivnað. Vitjanin hjá landsstýrismanninum gav næmingunum íblástur og staðfesti, at teirra rødd hevur týdning í føroysku skúlaskipanini.